شاذ رحمانی! شاعری کا خاموش جزیرہ از: احسان قاسمی

بسلسلہ ‘ سیمانچل ادب کا گہوارہ ‘
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

۔۔۔۔۔۔
تعارف
۔۔۔۔۔۔۔۔۔۔۔۔
اصل نام – محمد مجیب الرحمٰن
قلمی نام – شاذ رحمانی
والد – محمد مطیع الرحمٰن
تاریخِ پیدائش – ۱۹۵۲ ء
شریکِ حیات – صابرہ خاتون
اثمارِ حیات – بیٹے : چار ، بیٹیاں : دو
مستقل پتہ – محلہ ناصر گنج
ہری گنج چوک ۔ کٹیہار
رابطہ ( افتخار ؛ فرزند ) 7004473866
۔۔۔۔۔۔۔۔۔۔۔۔۔۔۔۔۔۔
تعلیم
۔۔۔۔۔۔۔۔۔۔۔۔۔۔۔۔۔۔
ابتدائ – عربی اور اردو کی مقامی مکتب میں
میٹرک – اسلامیہ ہائی اسکول ، کٹیہار ۱۹۶۸ ء

بی اے پریویس – ڈی ایس کالج ، کٹیہار ۱۹۷۰ء
۔۔۔۔۔۔۔۔۔۔۔۔۔۔۔۔۔
پیشہ – تجارت
۔۔۔۔۔۔۔۔۔۔۔۔۔۔۔۔
شاعری کی ابتدا – ۱۹۷۴ ء سے
۔۔۔۔۔۔۔۔۔۔۔۔۔۔۔
تلمذ. – جناب ظہیر غازی پوری
۔۔۔۔۔۔۔۔۔۔۔۔۔۔۔
اصنافِ سخن جن میں طبع آزمائی کی – حمد ، نعت ، نظم ، غزل ، رباعی ، قطعہ ، گیت وغیرہ
۔۔۔۔۔۔۔۔۔۔۔۔۔۔۔۔
اشاعت – شاعر ممبئی ، زبان و ادب پٹنہ ، ادب نکھار مئو ناتھ بھنجن ، بیسویں صدی دہلی ، گل کدہ بدایوں اور دیگر بہت سارے رسائل و جرائد
۔۔۔۔۔۔۔۔۔۔۔۔۔۔۔۔
شعری مجموعہ – ” شعور کی ردا ”
مطبوعہ – سنہ ۲۰۰۳ ء
۔۔۔۔۔۔۔۔۔۔۔۔۔۔۔۔۔
دیگر ادبی سرگرمیاں – ۱۹۷۴ ء میں ایک ذاتی لائبریری بنام ‘ اردو اسٹڈیز سرکل ‘ ہری گنج چوک ، کٹیہار کی بنیاد ڈالی ۔
اردو اسٹڈیز سرکل کے تحت ایک ادبی دو ماہی مجلہ ‘ غالب ‘ کی اشاعت ۔ اس کے دو شمارے شائع ہو سکے ۔
ادبی مجلہ ‘ غالب ‘ کے نائب مدیر رہے ۔
غالب کے مدیر اعلیٰ ضیاء رحمانی بھائی مرحوم و مغفور تھے ۔
۔۔۔۔۔۔۔۔۔۔۔۔۔۔۔۔۔۔۔۔
تاثرات
۔۔۔۔۔۔۔۔۔۔۔۔۔۔۔۔۔۔۔۔
شاذ رحمانی کی شخصیت میں جو سادگی ہے وہ ان کی شاعری سے بھی نمایاں ہے ۔ یہی سبب ہے کہ ان کا فکری نظام پیچیدگی اور تضاد سے عاری ہے ۔ گرچہ ان کا رنگ و آہنگ ، لب و لہجہ ، معنی آفرینی ، اسلوب ، لفظیات کا استعمال ابھی انہیں کوئی انفرادی شناخت عطا نہیں کرتے مگر یہ بات وثوق کے ساتھ کہی جا سکتی ہے کہ انہوں نے مشق و مزاولت کی منزلیں کامیابی کے ساتھ طے کر لی ہیں ۔ شاذ کی یہ مہارت قابلِ تحسین ہے ۔ ان کی فکری و فنی بلوغت سے بلاغت کی توقع کی جا سکتی ہے ۔
آمر صدیقی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
داغ ، احسن ، ابر اور ظہیر سے صحت و سلامتیِ فکر و فن اور شستگی و شائستگی زبان و بیان کا جو ورثہ شاذ رحمانی تک پہنچا ہے اس کے ضامن و امین ہونے کی شہادت ‘ شعور کی ردا ‘ سے بحسن و خوبی جلوہ بار ہے ۔ جائے مسرت ہے کہ شاعر نے تقاضہ” عصر حاضر کو نگاہ میں رکھ کر زندگی کے زوال آمادہ رجحانات کی پھسلن بھری ڈگر پر بھی ثابت قدم رہنے کی سعی کی ہے ۔ وقت کے چہرے پر جو کچھ لکھا ہے ، شاعر اسے پڑھ کر کانپتا تو ضرور ہے لیکن مایوس نہیں ہوتا ۔ عہد حاضر کے مسائل و مشکلات کے اندھیرے میں ذہن و دل کا لہو جلا کر حرف و معنی کے روشن دیے سرِ راہ رکھ دینے کا فن شاعر کو آتا ہے ۔
ناوک حمزہ پوری
۔۔۔۔۔۔۔۔۔۔۔۔۔۔۔۔۔۔۔۔۔۔۔
حمد
۔۔۔۔۔۔۔۔۔۔۔۔۔۔۔۔۔۔۔۔۔۔۔
طہور کی مئے پلا دے یارب
سرورِ ہستی بڑھا دے یارب
وقار بن جائے جو خودی کا
شعور کی وہ ردا دے یارب
حیات کا اب سفر ہو ایسا
جو روح و دل کو مزہ دے یارب
یہ ظرف مجھ میں کہاں کہ کہہ دوں
نقاب اپنا اٹھا دے یارب
نظر کو پھر دے ضیائے اطہر
انہیں شعورِ حیا دے یارب
رہا نہ اب معتبر کوئی بھی
کہ دل میں ایماں جگا دے یارب
لبوں کا ہر غم بنے تبسم
وہ صبر وہ حوصلہ دے یارب
ملال کچھ دور ہو جہاں کا
وہ کیف آگیں فضا دے یارب
معاف کیں شاذ کی خطائیں
کبھی یہ مژدہ سنادے یارب
۔۔۔۔۔۔۔۔۔۔۔۔۔۔۔۔۔۔۔۔۔
غزلیں
۔۔۔۔۔۔۔۔۔۔۔۔۔۔۔۔۔۔۔۔۔
شعور کی ردا مجھے عطا ہوئی حیات میں
کہ جس نے بھر دیا خودی کا رنگ میری ذات
جمودِ سنگ کیا ہے اور موجِ مضطرب ہے کیا
نشیب کیا ہے یہ فراز کیا ہے کائنات میں
یہ منکشف ہے اے خدا زمانے کی بساط پر
ہر اک چیز بے ثبات ہے تری ثبات میں
کوئی نہیں ہے دردمند دور دور تک یہاں
یہ کس طرح کا حادثہ ہوا مہیب رات میں
عذاب نو بہ نو ، فضا لہو لہو ہے چار سو
خدا ہی جانے آگے اور کیا ہو کائنات میں
لگاؤ فکر و فن سے شاذ اس طرح ہوا مجھے
مری حیات غرق ہو گئی تفکرات میں
۔۔۔۔۔۔۔۔۔۔۔۔۔۔۔۔۔۔

نوائے وقت کے شعلوں میں جل رہی ہے غزل
کہ مثلِ برف مسلسل پگھل رہی ہے غزل
بھرے بھرے سے ہیں دانشورانِ فکر و نظر
یہی سبب ہے کہ شعلہ اگل رہی ہے غزل
زمانے کی ہی روش میں ہے جب تغیر تو
خود آج اپنا بھی تیور بدل رہی ہے غزل
یہ خوب جانتے ہیں تشنگانِ شعر و ادب
کہ زہر سچ کا پلا کے مچل رہی ہے غزل
اک ایک لفظ شرر بار بن رہا ہے اب
شعور و فکر میں تپ کے نکل رہی ہے غزل
کسی کو تابِ نظر ہو تو دیکھے یہ منظر
کہ کیسے حرف و نوا میں دہل رہی ہے غزل
یہ بات شاذ عجب ہے مگر حقیقت ہے
فقط لہو سے خزانے اگل رہی ہے غزل
۔۔۔۔۔۔۔۔۔۔۔۔۔۔۔۔۔
شگفتہ فکر ، شگفتہ زبان رکھتے تھے
شکست و ریخت کا بس ہم ہی دھیان رکھتے تھے
انہیں میں ڈھونڈ رہا ہوں زمانے میں کب سے
جو سب کو اپنی نظر میں سمان رکھتے تھے
حیات ، رنج، تمنا اسی میں قید رہی
ہم اپنے جسم میں ایسا مکان رکھتے تھے
تمام عمر رموزِ حیات پا نہ سکے
ہر ایک شئے کا اگرچہ وہ گیان رکھتے تھے
زمیں پہ لا کے بچھا دیں گے آسمانوں کو
وہ سرپھرے تھے جو ایسا گمان رکھتے تھے
انہیں بھی ٹوٹتے دیکھا ہے دہر میں ہم نے
نہ ٹوٹنے کا جو دل میں گمان رکھتے تھے
وہ عہد ہے کہ انہیں بھی ملا نہ کوئی مقام
جو حرف و جذبہ کی اونچی اڑان رکھتے تھے
ہمیں بھی شاذ تھی امّید داد و تحسیں کی
کہ حرف و لفظ کی ہم بھی دکان رکھتے تھے
۔۔۔۔۔۔۔۔۔۔۔۔۔۔۔۔۔۔
دل آتشِ غم سے بھر گیا ہے
جھلس کے چہرہ اتر گیا ہے
سنواروں کیا زندگی کے گیسو
وجود ہی جب بکھر گیا ہے
کبھی ٹھہرتی نہیں ہے ساعت
عذابِ لمحہ ٹھہر گیا ہے
چلی ہے پروائ آج کیسی
کہ زخم دل کا اُبھر گیا ہے
غزل کا ہر شعر درد بن کر
ہر ایک دل میں اتر گیا ہے
یہ شاذ کا المیہ کہ اکثر
خوشی کے لمحوں میں ڈر گیا ہے
۔۔۔۔۔۔۔۔۔۔۔۔۔۔۔۔۔۔۔۔۔
زندگی کا امتحاں ہوتا ہے اکثر دھوپ میں
چھو کے دیکھو آگ بن جاتا ہے پتھر دھوپ میں
تاب ہے کس کو کہ دیکھے ایسا منظر دھوپ میں
” تپتے تپتے سرخ ہو جاتے ہیں پتھر دھوپ میں ”
اپنی منزل کا مگر اب تک نہیں ہم کو پتا
پاؤں ہے صحرا میں اپنا اور ہے سر دھوپ میں
سرد موسم میں مزہ ہے دھوپ کھانے کا کچھ اور
آؤ ہم تم چل کے بیٹھیں گھر سے باہر دھوپ میں
عصر حاضر نے ہمیں بخشا ہے اک تحفہ یہی
دیکھتے ہیں ہر سو دہشت ناک منظر دھوپ میں
کیا زمانہ آ گیا ہے شاذ لگتا ہے مجھے
آج کا انساں ہے جیسے کوئی پتھر دھوپ میں
۔۔۔۔۔۔۔۔۔۔۔۔۔۔۔۔۔۔
ملے دل کو جب زخم تازہ بہ تازہ
ڈھلی شعر میں فہم تازہ بہ تازہ
بہت کم اترتی ہے معیار پر اب
غزل نو بہ نو ، نظم تازہ بہ تازہ
کہاں تک کرے کوئی تقلید اس کی
زمانے کی ہے رسم تازہ بہ تازہ
چراغِ ذہانت کی لو ہو نہ جس میں
ہے بے سود وہ عزم تازہ بہ تازہ
فضائے تغیر میں اے شاد کچھ ہے
خبر ہوتی ہے گرم تازہ بہ تازہ
۔۔۔۔۔۔۔۔۔۔۔۔۔۔۔۔۔۔
خدایا کس قدر مشکل سفر ہے
ہمارے ساتھ جلتی دوپہر ہے
پتہ چلتا نہیں منزل کدھر ہے
شکستہ راستہ پیشِ نظر ہے
مجھے کیا غم چلے جھونکا ہوا کا
مری ہستی تو شمعِ رہ گزر ہے
برابر اس میں روحیں چیختی ہیں
ہمارا ذہن یادوں کا کھنڈر ہے
مہک صندل سی ہے تیرے بدن کی
لپٹ جائے نہ کوئی سانپ ڈر ہے
توجہ اس پہ ہے اب ناقدوں کی
ہماری شاعری میں وہ اثر ہے
مجھے ملتی نہیں ہے شاذ راحت
جہاں رہتا ہوں میں وہ کیسا گھر ہے
۔۔۔۔۔۔۔۔۔۔۔۔۔۔۔۔۔۔۔
خود غرض آج کا بشر نکلا
ذکر یہ بات بات پر نکلا
جس کو سمجھے تھے ہم عدو اپنا
اک وہی شخص معتبر نکلا
راس آیا دیارِ غیر مجھے
اجنبی تو مرا نگر نکلا
ختم تھا جس پہ وصفِ شادابی
وہ شجر بھی تو بے ثمر نکلا
جب کبھی جھانک کر اسے دیکھا
اپنا دل بھی کھنڈر کھنڈر نکلا
میں نے سمجھا تھا صبحِ نم اس کو
وہ مگر جلتی دوپہر نکلا
میری خاطر تو یہ جہاں یارب
درد و کرب و الم کا گھر نکلا
کہتے ہیں شاذ ہم جسے غالب
اس کا ہر شعر با اثر نکلا
۔۔۔۔۔۔۔۔۔۔۔۔۔۔۔۔۔۔۔
اس دور میں جب سب کچھ روا ہے
پھر کیا خطا ہے ، پھر کیا سزا ہے
خونی فضا ہے قاتل ہَوا ہے
پڑھئے یہ اخباروں میں چھپا ہے
ہم پر ہمیشہ پتھر چلا ہے
سچ بولنے کی کیا یہ سزا ہے
ہے گرم بازاری کشت و خوں کی
جینا بھی اب تو مشکل ہوا ہے
کھلنا کلی کا ، گل کا بکھرنا
اک ابتدا ہے ، اک انتہا ہے
آزار کی دنیا سے گزرنا
اے شاذ اک مشکل مرحلہ ہے
۔۔۔۔۔۔۔۔۔۔۔۔۔۔۔۔۔

آئینے میں اپنی صورت دیکھئے
حال و ماضی کی حقیقت دیکھئے
سامنے ہوں جب مسائل آپ کے
زندگی کی اصل صورت دیکھئے
تپتا صحرا ہے رہِ فکرِ سخن
آبلہ پائ کی لذّت دیکھئے
شعر کی تخلیق ہے احساسِ درد
یوں بصارت سے بصیرت دیکھئے
ہر طرف جب شعلگی کا ہے مزاج
نو بہ نو لمحوں کی آفت دیکھئے
حسن ہے اب اشتہاروں کے لئے
کاروباری یہ ذہانت دیکھئے
ہر نفس ہے زہر لمحوں کا اے شاذ
اپنی ہستی کی اذیت دیکھئے
۔۔۔۔۔۔۔۔۔۔۔۔۔۔۔۔۔
خشک موسم میں تو حسنِ زندگی ممکن نہیں
مسکرا اٹھے کوئی نازک کلی ممکن نہیں
وہ اگر آئیں تو شاید ضوفشاں ہو رہ گزر
ورنہ مٹ جائے یہ ظالم تیرگی ممکن نہیں
روح زخمی ہو تو بن سکتا نہیں جذبہ غزل
جب شکستہ ساز ہو تو نغمگی ممکن نہیں
مضمحل سا ہو گیا ہوں گردشِ حالات سے
لاکھ چاہوں پھر بھی ہونٹوں پر ہنسی ممکن نہیں
میرے چہرے پر ہے کچھ تابش ابھی باقی مگر
جسم کے اندر تو کوئی روشنی ممکن نہیں
شاذ جب تاریک ہے میرا مقدر تو کبھی
میرے آنگن میں بھی آئے چاندنی ممکن نہیں
۔۔۔۔۔۔۔۔۔۔۔۔۔۔۔۔۔۔۔
مشتعل اک سوال ہے مجھ میں
روح کیوں پائمال ہے مجھ میں
زندگی کے بکھرتے لمحوں کا
کیا پتہ کیا مآل ہے مجھ میں
مرے اندر اتر کے دیکھو تو
زندگی پائمال ہے مجھ میں
سنگِ الفاظ کیوں چلاتے ہو
خوں شدہ ہر خیال ہے مجھ میں
جسم مٹی کا پگھلا جاتا ہے
زندگی کا زوال ہے مجھ میں
شاذ ثابت قدم ہوں پھر بھی میں
ہر نفس جب وبال ہے مجھ میں
۔۔۔۔۔۔۔۔۔۔۔۔۔۔۔۔۔
تہمتوں کا ہم اشارا بن گئے
آج کیسا استعارا بن گئے
اس جہاں میں کم نگاہی کے سبب
بدگمانی کا نظارا بن گئے
چند کرنوں کو دکھا کر حرص کی
عہدِ نو کا وہ اجالا بن گئے
وقت بھی کروٹ بدلتا ہے عجب
موجِ دریا سے کنارا بن گئے
تپ گئے جب ہم انا کی آنچ میں
حرف و جذبہ بھی شرارا بن گئے
زندگی بھی ہے رسالے کی طرح
اور ہم پچھلا شمارا بن گئے
یہ صدا یہ گھر یہ دروازے میرے
مل کے اردو کا ادارا بن گئے
واقعی اس دور کے حالات بھی
کتنے غم کے گوشوارا بن گئے
اس زمیں کے آسماں کا شاذ ہم
اب شکستہ اک ستارا بن گئے
۔۔۔۔۔۔۔۔۔۔۔۔۔۔۔۔۔۔۔
بہار آئے گی ہر پھول مسکرائے گا
ہمیں یقین ہے وہ انقلاب آئے گا
وفا کے گیت میں گاتا رہا ہوں تیرے لئے
ذرا تو سوچ مرے بعد کون گائے گا
فریب و مکر کی ان بستیوں میں کوئی نہیں
حقیقتوں سے کبھی جو نظر ملائے گا
اُسے تباہی کا غم تو ضرور ہے لیکن
وہ آشیاں اسی گلشن میں پھر بنائے گا
وفا کا مارا کہیں چین سے بھی جیتا ہے
ترا خیال مجھے عمر بھر ستائے گا
خود اپنے حوصلے سے کام لے یہاں اے شاذ
پہاڑ غم کا کوئی اور نہیں اٹھائے گا
۔۔۔۔۔۔۔۔۔۔۔۔۔۔۔۔۔
ردا افکار کی ، نظروں کی قبائیں دے گا
تجھے دیکھے گا جو تا عمر دعائیں دے گا
حوصلہ ہو تو بہرگام ملے گی منزل
ورنہ ہر رستہ تجھے خود ہی سزائیں دے گا
کہہ رہا ہے کوئ مظلوم جہاں والوں سے
وقت خود مارنے والوں کو سزائیں دے گا
ایسی امید تو مجھ کو بھی نہیں ہے اے شاذ
دشت در دشت کوئ آکے صدائیں دے گا
۔۔۔۔۔۔۔۔۔۔۔۔۔۔۔
یہ زمیں چپ یہ آسماں چپ ہے
بات کیا ہے کہ ناگہاں چپ ہے
راز تو راز ہی رہے گا اب
درمیاں سب کے پاسباں چپ ہے
کون پوچھے سبب خموشی کا
کیوں سڑک چپ ہے کیوں مکاں چپ ہے
عصرِ حاضر نے یہ دکھایا ہے
ہر چمن چپ ہے آشیاں چپ ہے
شعلے نفرت کے کیوں نہیں بجھتے
کہہ کے یہ ہر کوئی یہاں چپ ہے
راحت و امن کی ہے ہند مثال
کہتا تھا جو وہ کارواں چپ ہے
ایسے ماحول میں جنابِ شاذ
سنتے سب ہیں مگر زباں چپ ہے