ہر ایک لب کی صدا محمد
ہر ایک دل کی دعا محمد
مریض دنیا دوا محمد
دوا محمد شفا محمد
درود ان پر سلام ان پر
خدا کی رحمت مدام ان پر
تمام عالم کے رہنما وہ
تمام نبیوں کے پیشوا وہ
سلگتے صحرائوں میں گھٹا وہ
ہماری کشتی کے ناخدا وہ
درود ان پر سلام ان پر
خدا کی رحمت مدام ان پر
وہی ہیں پیارے وہی دلارے
وہی ہیں چاند اور وہی ستارے
وہی نظر ہیں وہی نظارے
وہی ہمارے وہی تمھارے
درود ان پر سلام ان پر
خدا کی رحمت مدام ان پر
وہی ہیں عرشِ بریں کے مہماں
وہی نبوّت کے ماہِ تاباں
ہر ایک دل کے وہی ہیں ارماں
انھیں کو پڑھ لو وہی ہیں قرآں
درود ان پر سلام ان پر
خدا کی رحمت مدام ان پر
وہی ہیں چھت اور وہی ہیں زینہ
وہی انگوٹھی وہی نگینہ
وہی سمندر وہی سفینہ
خدا کے دلبر شہہِ مدینہ
درود ان پر سلام ان پر
خدا کی رحمت مدام ان پر
وہ جن کی باتیں ہیں روح پرَوَر
نظر میں جن کی ہیں سب برابر
مکان خستہ چٹائی بستر
پیمبروں کے مگر پیمبر
درود ان پر سلام ان پر
خدا کی رحمت مدام ان پر
نصیبے ور بد نصیب ان کے
رقیب ان کے حبیب ان کے
مریض ان کے طبیب ان کے
امیر ان کے غریب ان کے
درود ان پر سلام ان پر
خدا کی رحمت مدام ان پر
عجیب دولت وہ لے کے آئے
عظیم نعمت وہ لے کے آئے
خدا کی دعوت وہ لے کے آئے
زمیں پہ جنّت وہ لے کے آئے
درود ان پر سلام ان پر
خدا کی رحمت مدام ان پر
نظر عطا کی شعور بخشا
عبادتوں کا سُرور بخشا
زمیں کے ذرّوں کو طور بخشا
ہمیں ہدایت کا نور بخشا
درود ان پر سلام ان پر
خدا کی رحمت مدام ان پر
خدا کی چاہت جگائی دل میں
خدا کی عظمت بٹھائی دل میں
لگن خدا کی لگائی دل میں
خدائی مشعل جلائی دل میں
درود ان پر سلام ان پر
خدا کی رحمت مدام ان پر
سبق وفا کا پڑھانے والے
خدا کا رستہ دکھانے والے
گرے پڑوں کو اٹھانے والے
گلے سے اپنے لگانے والے
درود ان پر سلام ان پر
خدا کی رحمت مدام ان پر
ستم سہے رنج و غم اٹھائے
جو چوٹ پہنچی تو مسکرائے
محبتوں کے دئے جلائے
عداوتوں کے نشاں مٹائے
درود ان پر سلام ان پر
خدا کی رحمت مدام ان پر
بتائے کیا کوئی حال ان کا
خدا ہی جانے کمال ان کا
بڑی ہے دولت خیال ان کا
ضیا دلوں کی جمال ان کا
درود ان پر سلام ان پر
خدا کی رحمت مدام ان پر
محبتوں کی نظر محمدؐ
صدف صدف کے گہر محمدؐ
ہماری شام و سحر محمدؐ
ہمارے خیرالبشر محمدؐ
درود ان پر سلام ان پر
خدا کی رحمت مدام ان پر
